Adreus fascicularis

Descrición
Esponxa arborescente que pode chegar a alcanzar unha altura duns 15 centímetros. Pode presentar un desenvolvemento tubular ou ramificado e poden encontrarse varios exemplares xurdindo da mesma base, plana e extensa, que adoita estar enterrada no sedimento; os exemplares ramificados presentan facilidade para anastomosar as súas ramas en zonas onde se toquen. A ramificación tende a ser dicotómica, nun só plano, o que lle pode conferir aparencia de cornamenta. As ramas son cilíndricas, teñen un diámetro de 6 a 8 milímetros e terminan en punta. A súa superficie é lisa, mucosa e suave, con débiles estrías lonxitudinais baixo a súa superficie, dispostas de forma irregular, visibles incluso tras a súa conservación. Os ósculos son diminutos e case imperceptibles. Pode presentar unha fina capa de limo adherida á mucosidade da súa superficie, pero non presenta espículas sobresaíndo que atrapen o limo. A súa consistencia é firme, ríxida e correúdo. Non presenta olor e non é compresible. A cor da esponxa pode ser amarela, marrón, ocre, verdosa, laranxa ou amarela apardazada, coa punta das ramas máis escuras, xeralmente de cor parda.

Hábitat e Bioloxía
Desde os 10 ata os 30 metros de profundidade. Normalmente en fondos de area con cascallo móbiles semienterrada no sedimento que recobre leitos rochosos horizontais, esporadicamente en paredes rochosas verticais, en zonas de fortes correntes de marea. Tolera ben o lodo. 

Especies semellantes
Aínda que pode confundirse con outras esponxas erectas e ramificadas, as súas características diferenciadoras fana facilmente identificable: puntas afiadas, normalmente de cor máis escura e débiles estrías lonxitudinais.

Distribución
Desde o canal da Mancha ata as costas atlánticas españolas.

Curiosidades
O nome da especie, fascicularis, é un termo latino que significa ‘enleado, agrupado’, en referencia ao anastomosamento das ramas que se tocan.